Tech Talk - MS PowerPoint قصة البداية
متابعينا الاعزاء ازيكم
هنستأنف كلامنا عن برنامج العروض التقديمية باوربوينت MS PowerPoint
في البداية خالص كانت الفكرة الأساسية لكتابة برنامج زي الباوربوينت ان يكون في تطبيق بيساعد المحاضرين و المسوقين على عرض المخططات و الرسوم البيانية Charts على جهاز العرض الرأسي Overhead Projector بسهولة , لأن الموضوع وقتها كان صعب و مكلف جدا ( احنا بنتكلم عن حقبة التمانينات )
 |
| بداية الباوربوينت كانت لعمل المخططات للعرض على ال overhead projector |
لكن و مع تطور انظمة التشغيل و اللجوء لبيئة عمل جرافيكية او ما يعرف بواجهة المستخدم الرسومية GUI واللي كانت ترند التكنولوجيا وقتها , قامت شركة ناشئة اسمها Forethought ومقرها في ال Silicon Valley واللي تم انشئها سنة 1983 بعمل برنامج مش بس يعرض ال Charts على ال Overhead Projector , لأ ده بيساعد العاملين في بيئة الاعمال التجارية و الأكاديمية على عمل عروض كاملة باستخدام برنامج يعمل بال GUI ومخصص للحواسب الشخصية اللي بتشتغل بال GUI زي MS Windows و Apple Mac.
مطورين البرمجيات في Forethought واللي اشتغلوا على البرنامج من سنة 1984 وحتى 1987 هما Robert Gaskins , Dennis Austin و Thomas Rudkin , الحقيقة ان روبرت و دينيس هما اللي اشتغلوا من البداية خالص وان توماس لحقهم بعد بداية المشروع بسنة تقريبا , واخرجوا البرنامج للنور في ابريل 1987 وهو مكتوب خصيصا للعمل تحت Apple Mac.
 |
| مطوري البرنامج سنة 1987 |
البرنامج كان من القوة و الانتشار اللي خلوا Microsoft تعمل اول عملية استحواذ حقيقية لشركة Forethought في اغسطس 1987 ودفعت 14$ مليون دولار امريكي , عشان خاطر تستحوذ على حقوق انتاج و استغلال PowerPoint وحافظت على مقر الشركة الاصلية و بقى هو المقر الاساسي لأنتاج باقي الاصدارات اللي عرفناها من باوربوينت PowerPoint بعد كده, وسيطرت سيطرة تامة علىى القطاع ده مش في امريكا لوحدها , لأ ده في العالم اجمع ومن سنة 1987 لحد النهاردة.
على فكرة اسم باوربوينت PowerPoint ده مش مصادفة, اسم البرنامج في الاول كان Presenter و اتغير عشان حقوق استغلال الاسم التجاري , وخرج PowerPoint اعتمادا على كونه يمثل نقاط قوة كتير في عالم البيزنس, واستمر بنفس الاسم ليومنا هذا .
 |
| الاصدار الاول من PowerPoint واللي كان بيشتغل تحت MAC OS |
- طيب ايه هي اصدارات باوربوينت PowerPoint المختلفة؟ وايه هي نقاط التميز في كل اصدار ؟
تابعونا عشان نعرفوا اكتر عن اصدارات البرنامج المختلفة وتطورها من خلال سلسلة مقالاتنا التقنية tech talk واللي نتمى انها تكون بسيطة ومفيدة و توصل لولادنا بطريقة محببة.
في انتظار تعليقاتكم و اسئلتكم
اهلا بيكم دايما معانا
مهندسة/ أميرة
ادمن صفحة اليكس كيدز 😊
تابعونا على صفحتنا على الفيسبوك
تعليقات
إرسال تعليق